தமிழகம் முழுவதும் தாய்மாமன் தங்க மோதிரம் திட்டம் இன்று தொடங்கப்பட்ட நிலையில், விருதுநகர் அரசு மருத்துவக்கல்லூரி மருத்துவமனையில் நடைபெற்ற நிகழ்ச்சியில் சமூக நலன் மற்றும் மகளிர் உரிமைத்துறை அமைச்சர் ஜெகதீஸ்வரி திட்டத்தை தொடங்கி வைத்தார்.
மதுரை அரசு ராஜாஜி மருத்துவமனையில் நடைபெற்ற மாநில அளவிலான தொடக்க நிகழ்ச்சியைத் தொடர்ந்து, விருதுநகர் மாவட்டத்திலும் திட்டத்தின் கீழ் பயனாளிகளுக்கு தங்க மோதிரங்கள் வழங்கும் நிகழ்ச்சி நடைபெற்றது. அரசு மருத்துவமனைகளில் பிறக்கும் குழந்தைகளுக்கு தலா ஒரு கிராம் எடையுள்ள தங்க மோதிரம் வழங்கும் வகையில் இத்திட்டம் செயல்படுத்தப்படுகிறது.
2,676 குழந்தைகளுக்கு தங்க மோதிரம்
விருதுநகர் மாவட்டத்தில் ஜூன் 22, 2026 முதல் அரசு மருத்துவமனைகளில் பிறந்த குழந்தைகள் திட்டத்தின் கீழ் பயனாளிகளாக சேர்க்கப்பட்டுள்ளனர்.
அதன்படி,
- விருதுநகர் அரசு மருத்துவக்கல்லூரி மருத்துவமனை – 481 குழந்தைகள்
- அருப்புக்கோட்டை அரசு மருத்துவமனை – 432 குழந்தைகள்
- சிவகாசி அரசு மருத்துவமனை – 800 குழந்தைகள்
- ராஜபாளையம் அரசு மருத்துவமனை – 520 குழந்தைகள்
- ஸ்ரீவில்லிபுத்தூர் அரசு மருத்துவமனை – 443 குழந்தைகள்
என மொத்தம் 2,676 குழந்தைகளுக்கு தங்க மோதிரம் வழங்கப்பட உள்ளது.
5 மருத்துவமனைகளில் மோதிரம் வழங்கல்
விருதுநகர் மாவட்டத்தில் உள்ள 5 வட்டார அரசு தலைமை மருத்துவமனைகளில் தலா 50 பயனாளிகள் வீதம், மொத்தம் 250 பயனாளிகளுக்கு தங்க மோதிரங்கள் வழங்கப்பட்டன.
மாவட்டத்தில் உள்ள அரசு மருத்துவமனைகள் மற்றும் ஆரம்ப சுகாதார நிலையங்கள் மூலம் திட்டத்தை தொடர்ந்து செயல்படுத்த ஏற்பாடுகள் செய்யப்பட்டுள்ளன. முன்னதாக, விருதுநகர், அருப்புக்கோட்டை, சிவகாசி, திருவில்லிபுத்தூர் மற்றும் ராஜபாளையம் ஆகிய 5 வட்டார அரசு தலைமை மருத்துவமனைகளில் திட்டத்துக்கான ஏற்பாடுகள் மேற்கொள்ளப்பட்டிருந்தன.
மருத்துவமனையில் இருந்து வீட்டுக்குச் செல்லும்போதே மோதிரம்
இனி வரும் காலங்களில் அரசு மருத்துவமனைகள் மற்றும் ஆரம்ப சுகாதார நிலையங்களில் பிரசவிக்கும் குழந்தைகளுக்கும் திட்டத்தின் கீழ் தங்க மோதிரம் வழங்கப்படும்.
பிரசவத்திற்குப் பிறகு தாயும் குழந்தையும் மருத்துவமனையில் இருந்து வீட்டிற்குச் செல்லும்போதே தங்க மோதிரத்தை வழங்கும் வகையில் ஏற்பாடுகள் செய்யப்பட்டுள்ளதாக தெரிவிக்கப்பட்டுள்ளது.
திட்டத்தின் பயன்கள் உரிய பயனாளிகளுக்கு சென்றடையும் வகையில் மாவட்ட நிர்வாகம் மற்றும் சுகாதாரத்துறை சார்பில் நடவடிக்கைகள் மேற்கொள்ளப்பட்டுள்ளன.